Ejije Edereede Dị Ka Ngwa Nzipụta Na Nchekwa Omenala Na Nkwenye Ndi Igbo: Ịleba Anya N’akwụkwọ Agumagụ Ejije Ọkụ Ghara Ite Na Ụwa Ntọọọ

Abstract

N’oge ugbu a, ụfọdụ ndị na-etolite etolite amaghị ihe gbasara omenala na nkwenye ndị Igbo n’ihi oke nleghara anya na enweghị mmasị n’ebe omenala Igbo dị. Ọ bụ nsogbu dị otu a kpaliri mmụọ nwanchọcha ime nchọcha n’isiokwu a, iji gosipụta na e nwekwara ike iji akwụkwọ agụmagụ ejije chekwaa ma gosipụtakwa omenala na nkwenye ndị Igbo. Nwanchọcha bụ n’obi iji nchọcha a mee ka ndị Igbo hụ mkpa ọ dị ichekwa na ịgbasa omenala Igbo ọkachasị ndị ahụ na-enye aka ịhazi ndụ na akparamagwa ndị mmadụ. Nwanchọcha gbasoro atụtụ Kọlchọral Matịrịalizim, nke bụ echiche iji nyochaa ederede omenala, ma na-agba mbọ ijikọta agụmagụ ọbụla site n’oge e dere ya ma wepụtasịa omenala na nkwenye ndị pụtara ihe n’akwụkwọ agụmagụ ejije ndị a họọrọ. A chọpụtara na akwụkwọ agụmagụ ejije abụọ a họọrọ zipụtara ma chekwaa omenala na nkwenye ndị Igbo n’ozuzu oké, bụ nke na-enye aka ịhazi ndụ na akparamagwa ha. N’ikpeazụ, a tụrụ anya na nchọcha ga-abara ọhanaeze uru, n’ihi na ọ ga-eme ka ndị Igbo, ọkachasị ndị na-etolite etolite hụ mkpa ọ dị ịchekwaba omenala na nkwenye ha, n’ihi na, ọ bụ omenala ka e ji amata agbụrụ onye si na ya pụta.